La Passem que s’acaba dab estrambòrd

Published in Occitània Read 254 times

Ua escaduda reau per aquera purmèra edicion de La Passem organizada per l’associacion Ligams. La corsa que contava mei de 400km ,

460 qu’estón venuts e la corsa ne s’ei pas estancada tot au long deus 48ò de caminada encuadrada per motos e camions. Monde de tot atge, qui n’èran pas inscrivuts, que son vienuts participar au darrèr moment a pè, mes tanben en bicicleta o enqüèra a chivau. La nuèit com lo dia, en montanha tau com en la plana, los Gascons qu’an muishat la loa capacitat a mobilizà’s a l’entorn de la lenga nosta. Au demiei deus sostien que contam associacions, enterpresas, particulars, comitats de las hèstas, colectivitats, clubs d’espòrts, medias e moviments politics : POC, Libertat, ODPO,… Aqueths que profieitén de l’eveniment entà gahar l’uelhada sus lo permés d’espleitacion deu sòu en Nòrd Biarn (c.fòto).

Aquera corsa qui comencè divés 25 de mai a Bidaishen, que s’acabè en hestau au barri deu Hedars a Pau lo dimenge 27 de mai en lo futur « ghetto occitan » volut per François Bayrou (qu’i torneram en un article futur). Lo moviment occitanista que muishè atau qu’ua consciéncia vertadèra existeish en Biarn e qu’aqueth moviment tròp sovent a l’estaca de l’esquèrra francesa, e sap tirà’s de las pelejas de tot dia entà prepausar un còp de fòrça mediatic e sociau en l’estrambòrd generau.

Ad aqueth eveniment que’u hè besonh revendicacions. Qu’èm arribats au cap de la desnacionalizacion deu noste pòple. Bascos, Bretons, Occitans, Catalans ne córren pas taus sòs, ne córren pas tanpòc entà mantiéner un sistèmi dependent de las subvencions. Que córren entà cridar au monde : « Existim ! ». Aquera consciéncia que’s dèu armar de demandas. Qu’avem lo dret a l’autodeterminacion, qu’avem lo dret d’aver la lenga oficiau, qu’avem lo dret de’ns liberar deu sistemi capitalista e qu’avem lo dret de diser non a la França imperialista.

Las edicions que’s haràn tots dus ans e lo parcors que cambiarà a cada còp. La moneda ganhada per Ligams que deveré servir a finançar projèctes pertocant la transmission de la lenga. Atau, los mes a viéner que seràn decisius entà analizar la politica de « distribucion » de sòs de Ligams. Que podem dejà pensar qu’un finançament tròp ahortit sus l’ua o l’auta de las estructuras occitanistas que harà sortir las pelejas demoradas a la bòrda lo temps de la corsa. Esperem que l’aviéner e’ns pròva lo contrari.

Osca La Passem