Perqué los ensenhaires deven har tots e totas la cauma lo 5 de deceme.

Published in Occitània Read 824 times



Perqué los ensenhaires deven har tots e totas la cauma lo 5 de deceme.

 (Contribucion d'un professor d'occitan.)



  • Pr’amor que las condicions de tribalh e’s durceishen mei anar mei : efectius hauts, manca d’arremplaçants.as, barraduras de pòsts, desplaçaments, sanccions de l’administracion e manca de sostien, violéncia creishenta deus eslhèves e de pairs e mairs, desinformacions e calomnias sus l’ensenhament bilingue e donc mesa en tension de las equipas pedagogicas hens las escòlas publicas, faussas ideas qui circulan sus Calandreta tanben, sindicats francés temerucs o a còps complicis de l’Estat…

  • Pr’amor que la refòrma de las retrèitas e’ns heré pèrder haut o baish 300€/mes mentre que l’economia globau aumenta e los salaris de la borguesia e pujan a tot hòrt.

  • Pr’amor que pagam cada dia en classa l’individualizacion deus mainats creada per la societat capitalista entrainant çò que Philippe Meirieu (pedagòga) evòca com ua pedagogia de « garçon de café »* on los ensenhaires van d’un eslhève a l’aute tad explicar individuaument ua consigna totun balhada collectivament.

  • Pr’amor que lo noste ministre JM Blanquer vòu tuar la nosta lenga nacionau (l’occitan) e s’inscriu atau en ua tradicion franchimanda d’etnocidi deus Occitans e de las Occitanas com de las autas nacions de l’Estat Francés qui conta 75 lengas « reconeishudas ».

  • Pr’amor que la volontat governamentau de privatizar tots los servicis publics ei clara e que dèu estar combatuda.

  • Pr’amor que n’avem hartèra, nosautes professors.oras, de har a l’amortider sociau, las familhas descargant las loas frustracions economicas e sociaus sus l’escòla.

  • Pr’amor n’èm pas los sols a patir deu liberalisme e que devem estar solidaris entre nosautes : los e las tribalhadors.oras deu public e deu privat, los retirats, los caumaires, los pompièrs, las hemnas agressadas,…

Entau País, entaus collègas, entaus mainats, entau pòple, tots e totas en cauma lo 5 de deceme !

 

*https://www.lemonde.fr/idees/article/2011/09/02/contre-l-ideologie-de-la-competence-l-education-doit-apprendre-a-penser_1566841_3232.html