Entervista deu Jan Labourie e deu Cinerrante

Published in Cultura

E’t pòts presentar en quauques mots ?

Adishatz a tots,

Que m'apèri Jan Labourie, que vieni de Pau e qu'ensagi de har documentaris sociaus, politics e artistics …. çò qui n'ei pas tostemps aisit ! Qu'escrivi uei desempuish l'estat de Sinaola au Mexic.




 Qu’ès actuaument en America latina entà miar lo projècte Cinerrante, quau ei la tòca d’aqueth projècte ? e perqué ès partit en aquera enterpresa ?
 Lo hons deu projècte qu'ei de har filmòts en lenga qui disen aquiu « indigena » tà la har viver e tà portar la votz d'aqueths pòbles tròp sovent desbrombats. Qu'ei tanben un moment de partatge, d'escambi e qu'acabam lo tribalh en amuishant lo film a tota lo comunautat dens ua serada cinematografica.

Quau son las contranhas principaus en aquera aventura ? I ès partit solet ? E t’ès trobat en situacions perilhosas o mauaisidas ?
 
Que n’i a duas. La purmèra qu'ei la securitat e la dusau qu'ei de’s har acceptar dens la comunautat. Qui a tanben de's compréner per’mor los mainats ne parlan pas castilhan, la lenga qu'avem en comun dab los regents.

Quin reageishen lo monde cap a la toa camerà quan e’us demanda de parlar la loa lenga ? las reaccions e son omogènes ?

Peu moment qu'èi avut duas tracas de persona qu'an acceptat de parlar a la camerà. Los qu'i avevan autoritat e que parlan deus problemas deu pòble e los que volèvan ajudar e har avançar l'educacion deus mainats.

N’ei pas lo purmèr còp que corris l’america centrau, que pensi au ton documentari No somos de palma (2012), e vedes evolucions ? Quin espiar e pòrtas sus los pòbles minorizats acerà ? E pateishen tots l’espleitacion ?


Que soi adara dens parçan que ne coneishevi pas donc n'ei pas aisit de har un comparèr mes çò que vedi qu'ei que son los medish problemas despuish decadas. L 'aiga e la terra que son panadas per l'estat o enterpresas o narcotraficans e que son tostemps los medishs qui s’arretròban shens arren...

Entà seguir lo projècte deu Jan Labourie que’s passa açi-baish :


www.cinerrante.jimdo.com

 

Credit fòto : Jan Labourie

More in this category: « Ultras d'Occitanie