Pelòt, lo rodatge de la seria que debuterà en julhet. A tu Pelòt!

Published in Cultura

L’istòria de la familha Lamon dab lo son ainat Jan Lamon, dit Pelòt, que deveré pro vist despassar las termièras de la Bigòrra on lo son nom ei enqüèra vitec. En efèit, l’associacion Art’Ờc qui a dejà hicat un pè en l’audiovisuau dab los filmòts « Shens Papèrs » (2016) e « Triste ei lo cèu » (2018) , que s’i torna augan dab un projècte de seria dedicada a la familha deu Pelòt e ad aqueths gascons e aqueras gasconas qui an coneishut e patit l’Empèri de Napoleon Ièr.

A l’ostau de familha en lo vilatge de Soreac (Bigòrra) qu’ei la mair, Jana, qui comandava. La dauna qui daunejava qu’estó confrontada a l’epòca a çò que viscón milierats de familhas devath la dominacion francesa. Que calèva causir : pèrder los hilhs qui èran tirats au sòrt tà las guèrras en Euròpa tota entà realizar lo saunei imperialista francés o estujar-los en secret hens la natura. Com un hèish de monde, los Lamon que causín de préner lo maquís. Quasi tots que seràn arrestats o que torneràn en pagar la loa fauta mes Pelòt lo paisan, eth, que coneisherà un hat particular. En purmèr, pr’amor que la soa escapada durerà annadas e annadas e que vaderà un bandolèr cranhut e respectat. En dusau, pr’amor que’s guardava un estacament hòrt aus qui èran de la soa condicion sociau e que’us ajudava de quan en quan. Atau que vadó ua legenda locau qui hè pensar au « Robin des bois ».

Los autors Eva Cassagnet e Julien Cabarry, qu’an volut guardar l’esperit d’aqueth Pelòt, bandolèr romantic, tot en espleitar los sons defauts mei durs. Ne cau pas desbrombar qu’estó acusat d’un murtre d’ua persona e d’un viòl d’ua auta ! Accusacions qu’ac refuterà tot au tribunau com totas las autas accusacions que sian faussas com vertaderas. La seria que’s vòu umoristica mes que respeterà ua bona partida de las hèitas e sustot la realitat linguistica de l’epòca. Quauques anacronismes e clinhets a films e serias coneishuts que deverén estar vededèrs mes ne’n sabem pas mei peu moment.

Un crowfunding entau pilòte

Entad aver un pilòte de qualitat, los productors dejà ajudats per partenaris com Ligams-La Passem, Fiva Créations e lo Castèth de Croselhas, que cèrcan de qué completar lo budgècte e meliorar la qualitat tecnica deu projècte. Atau que lançan un crowfunding sus la platefòrma « Touscoprod ». Que suffeish de seguir lo ligam : https://www.proarti.fr/collect/project/pelot/0

L’equipa deu rodatge

La seria que serà co-produita dab Chicken’s Chicots, ua enterpresa bordalesa qui miarà totas las soas competéncias tecnicas e Oc tele qui deveré integrar lo projècte e difusar la seria a partir de 2020. Dimèrcs passat, lo casting deu purmèr episòdi qui servirà de pilòte qu’estó clavat. Ueratz ací-baish la lista oficiau deus actors retienuts qui son tots e totas amator(a)s :

Jana (mair de Pelòt) : Nadeta Carita

Domenge (pair de Pelòt) : Miquèu Cabarry

Pelòt : Pascau Sebat

Caterina (sòr de Pelòt) : Valeria Védère

Pèir (hrair de Pelòt) : Pèir-Arnaut Grosclaude-Lapléchère

Guilhem (hrair de Pelòt) : Julian Bayssac

Loctenent De chevreuil : Domenge Rémy

Brigadier Cazenave : Clamenç Florós

Brigadier Castanier : Adrian Sarraillé

Bernat : Robert Tamburello

Aqueth episòdi que serà rodat en julhet en Bearn. Los autes episòdis que seràn rodats en 2020 e que haràn l’objècte d’un navèth casting.

Que pòden seguir l’actualitat de Pelòt-la seria sus la pagina facebook :

https://.facebook.com/seriePelot/

A tu Pelòt !